انا من وين ابالقى بالقصيد الها لبلاد أوصاف
غنية عن بيوتي لو بيوت اشعاري جداده
ترى ما جيت ابا استعرض وقول اني وحيد القاف
انا جندي وميدان الشرف هو قمة اعياده
انا جيت اعتذر قلت القليل وبالقلوب اضعاف
مشاعر واحد منكم وفيكم يعشق بلاده
عزيزة يا بلادي ما عليك من الحسود خلاف
عزيزة وابشري فينا ترى الارواح سداده
عزيزة وابشري وقفة صناديد الرجال اصناف
ينادون المنايا والرباط بأرضك عباده
ترى كل القلوب اللي غذيتي ما بها خواف
ترعرع في ثراك الطاهر الإقدام واسياده
على ترابك نرابط والذخيره والبذال الحاف
ولا والله حسبنا للسفيه وطغمة احقاده
هنا ارض الرسالة والرسول ومنبع الأعراف
هنا مجد العروبة والكفاح وسيرة القادة
هنا من بعد ما كان الضعيف من القوي يخاف
يصير الأمن مع عبدالعزيز الفذ ميعاده
هنا تاريخ ابو تركي عظيم المجد والأوصاف
هنا المجد التليد من أول اجداده لأحفاده
رحمك الله يا اللي تفخر بانجازه الأسلاف
مثل ما فخرنا يصعب على الاشعار تعداده
وسلام الله عدد ما زارها مسلم وفيها طاف
كثر فخر السعوديه بحامي ديرة اجداده
نجدد عهدنا للقادة اللي دارهم مضياف
وطن للمسلمين وكل مسلم شوفها مراده
نعاهد ربنا ثم الوطن وقيادة الإنصاف
فلا غير السعودية وآل سعودها قياده
سلمتي يا بلادي من يدين الحقد والإجحاف
وطن شامخ ولا يزعزع كيانه حقد حساده
تحيه يا رجال أمن الوطن بالمدن والارياف
رجال تسهر ودايم على الوقفات معتاده
تهقوي في بسالتهم وخلي خايب الأهداف
مصير الخايب المسعور يلقى خيبة اوغاده
رجال ترخص الروح لأمان بلادها ما تخاف
عزايمهم عظيمه للمصاعب دوم رواده
ليا من جا البلاغ من المواطن يطلب الإسعاف
يقولون ابشر بعزك نخيت الجود واجواده
تدربنا على خدمة بلدنا والجهود تشاف
هدفنا امن الوطن وحماية الإنسان واسعاده
تنوف افعالنا بدروس من مجده وفعله ناف
عسى الله يحفظه للأمن (نايف) نافت امجاده
نذر نفسه لخدمة ها لبلد مترامي الأطراف
سديد الرأي والرأي السديد لنايبه عاده
بلادي تفخر بأمن المدن والبر والأرياف
وتفخر بالأمير محمد اللي امنها زاده
