استلهمت نظرة الشاعر تعابيره
وفي حضرة المجد خط الشاعر الهامة
يا الله يا للي تعيش الخلق من خيره
يا والي العرش رب الكون علامه
تحفظ وطنا وتنصر قادة الديره
اللي ارفعوا في سماها عالي أعلامه
واحم المليك المفدى طيب السيره
خادم حرم ربنا والكل خدامه
وادحر عدو علينا جيوشه مغيره
ناس على الظلم والعدوان قوامه
يحاربون الشريعه باسم تطهيره
وكل البشر دانهم.. وارهابهم لامه
أشد من قتلة المعصوم تكفيره
ومن حارب المسلمين يشك بإسلامه
أبشر يا لإرهاب في ذله وتحقيره
مبادي ساقطه.. وأفكار هدامه
قوة طوارئ وطن جت لك مغاويره
ضباطنا حازمة والجند جزامه
دون الوطن صفنا ممنوع تكسيره
من خلف نايف لبسنا العزة عمامه
حنا هل السلم لا حامت عصافيره
وحنا هل الحرب ليل الحرب وأيامه
نبيع الأرواح ما نحتاج تسعيره
الروح لأجل الوطن ربحان سوامه
يشهد شهيد افتخرنا به على غيره
شهيد واجب عزيز.. علق وسامه
يا الله تزيد له وسط القبر تنويره
وتعطره من عبير الخلد وانسامه
وتديم عز الوطن وتزيل تكديره
وتدعم أمنه وتحفظ كل حكامه
